Poetry: Para sa Isang Rebolusyonaryo by Roberto Miguel Rañeses

Para sa isang Rebolusyonaryo

ni Roberto Miguel O. Rañeses

naaalala mo pa ba,

noong tayo’y mga musmos pa

na puno ng saya’t walang pinoproblema
naglalaro’t natutulog na walang inaalala?

naaalala mo pa ba,

noong ating pinagpalit ang mga laruan at habulan

para sa kwaderno, libro’t paaralan

at unang namulat sa problema’t pagdaralita?

naaalala mo pa ba,

noong tayo’y nasa isang rally

para sa kalayaan at katarungan

at tayo’y nangakong walang iwanan sa isa’t isa?

naaalala mo pa ba,

noong tayo’y nasa gitna pa ng labanan,

ika’y yumakap at kumapit ng mahigpit,

na tila ba hindi na tayo magkikita ng muli?

naaalala mo pa ba ng lahat ng ito,

ngayong ako’y muling maglalatag

ng isang makulay na pumpon

sa iyong kupas na puntod?