Story: Ang Pamilya sa Dalampasigan by Vincci Santiago

Ang Pamilya sa Dalampasigan

Vincci Santiago

 Sumikat na ang araw sa Barrio Nahiling pagkatapos ng pananalasa ng bagyo. Natagpuan ni Amy si Tikboy na naglalakad sa dalampasigan. Sa pagitan ng mga nagkalat na bali-baling kahoy at sanga na inanod pa ng bahang rumagasa mula sa kabundukan, mga pira-pirasong kabibe, mga patay na isda, mga kinakalawang na lata ng gatas at mga balot ng sitsirya, mabagal na iniaapak ni Tikboy ang maliliit at magagaspang niyang paa sa buhangin.

 Tumakbo si Amy kay Tikboy at niyakap ito nang mahigpit. Humagulgol ang babae at pinupog ng halik ang maputik na buhok, noo, at pisngi ng bata. Sa pagitan ng mga hikbi at halik ay tinatanong ni Amy kung saan naglagi ang bata noong kalakasan ng bagyo, at kung bakit hindi pa ito umuwi pagkatapos pumanhik sa bundok para manguha ng panggatong. Ngunit, nanatiling walang-kibo at tulala ang bata. 

 Lumuhod si Amy sa harap ni Tikboy. Niyugyog niya ito at sinigawan. Subalit natigilan ang babae nang makitang may nagbago sa mata ni Tikboy. Itim na ang mga ito. Walang gahiblang mga ugat, walang puting namumula kapag kinusot, itim lahat. 

 Patuloy na tinitigan ni Amy ang mata ni Tikboy. ‘Di niya malaman kung bunsod lamang ng pagod at pagkayanig sa mga nakalipas na pangyayari ang nakita niyang unti-unting nagbabago sa itim na mata ni Tikboy. Nakita niyang nabubuo sa itim na mata ng bata ang imahe ng isang babaeng nakabulaklaking duster, may kulot at maitim na buhok, at namumugto ang mata. Napanganga na lamang si Amy. 

 Ilang sandali pa ay may nabubuo sa likuran ng babae-sa-mata na dalampasigang tulad ng kinatatayuan ni Amy at Tikboy. Lahat ng kahoy at sanga, kabibe, patay na isda, lata ng gatas at balot ng sitsirya, naroroon din. Naroroon din ang payapa nang dagat at tirik na araw sa tanghaling-tapat na iyon. Napako si Amy sa puwesto niya sa harapan ni Tikboy. Tumigil na ito sa pag-iyak at nanatiling nakatitig sa bata, nakanganga. 

 Sa ganoong estado sila nakita ni Gardo. Ibinagsak ni Gardo ang hawak niyang lambat at tumakbo papalapit kina Amy at Tikboy. Ikinulong ni Gardo ang bata sa malalaki at namamawis niyang bisig. Ganoon din ang mga tanong ni Gardo - kung saan nagpunta ang bata, kung bakit hindi pa ito umuwi agad. Subalit, bigla na lamang itong tumigil nang magkatamaan sila ng tingin ni Amy.

 Lumipas ang ilang oras at dumami ang mga taga-Barrio Nahiling na naglalakad sa dalampasigan – naghahanap ng mga maaaring masalbang ari-arian, naghahanap ng mga katawan.  May ilan sa kanilang naglakad papalapit kina Tikboy, Amy at Gardo - nagtataka kung bakit sabay-sabay na nakayukong naglalakad nang paikot-ikot ang pamilya sa dalampasigan.